Türkmenistanyň Belgiýadaky Ilçisi Sapar Pälwanow The Brussels Times neşiriniň wekili Ilham Rzaýew bilen geçiren duşuşygynda metbugat ulgamynda hyzmatdaşlyk mümkinçiliklerini we bilelikdäki maglumat taslamalaryny durmuşa geçirmekligi hem-de bu ugurda alnyp barylýan işleri ara alyp maslahatlaşdylar. Bu barada Türkmenistanyň Belgiýadaky ilçihanasy çarşenbe güni habar berdi.

Duşuşykda Sapar Palwanow diplomatiki wekiliýetiň esasy ugurlary bilen tanyşdyryp, daşary syýasy ileri tutulýan ugurlaryň wagyz edilmeginde jemgyýetçilik diplomatiýasynyň ähmiýetini aýratyn belledi. Şeýle hem ilçihananyň metbugat wekilleri we hünärmenleri bilen yzygiderli brifingleri hem-de duşuşyklary geçirip, ýurtda alnyp barylýan oňyn içerki we daşary syýasatlar barada maglumatlary berýändigini aýtdy.

Taraplar Türkmenistanyň medeni mirasyna, parahatçylyk döredijilik başlangyçlaryna, özboluşly taryhyna we häzirki zaman gazanan üstünliklerine bagyşlanan neşirleriň taýýarlanylmagynyň mümkinçiliklerini ara alyp maslahatlaşdylar. Şeýle hem Türkmenistanyň hemişelik bitaraplyk, hoşniýetli goňşuçylyk we durnukly ösüş ýörelgelerine ygrarlylygy, şol sanda BMG-niň meýdançasyndaky başlangyçlary aýratyn bellenildi.

Duşuşygyň ahyrynda taraplar hyzmatdaşlygy ösdürmäge gyzyklanma bildirip, halkara köpçülikleýin habar beriş serişdeleri bilen işjeň gatnaşyk gurmaga taýýardyklaryny tassykladylar.

1965-nji ýylda döredilen The Brussels Times neşiri Belgiýanyň iň gadymy iňlis dilli gazetidir. Häzirki wagtda ol Belgiýa we Ýewropa Bileleşigindäki wakalar barada halkara okajylara, şol sanda diplomatlara, Ýewropa institutlarynyň wekillerine we işewür toparlaryna niýetlenen ygtybarly çeşme hökmünde çykyş edýär.