2026-njy ýylyň 7-nji oktýabrynda «Awaza» milli syýahatçylyk zolagynda Türkmenistanyň 2026-njy ýylda Garaşsyz Döwletleriň Arkalaşygyna başlyklyk etmeginiň çäklerinde geçirilýän çäreleriň meýdançasynda   Türkmenistanyň Ministrler Kabinetiniň Başlygynyň ulag we aragatnaşyk toplumy boýunça orunbasary Batyr Annaýewiň Eýran Yslam Respublikasynyň Ýol we şäher ösüşi ministri Farzane Sadyk bilen duşuşygy geçirildi.

Duşuşygyň dowamynda taraplar iki goňşy döwletiň arasyndaky dostlukly we doganlyk gatnaşyklaryň häzirki ýagdaýyny, şeýle hem köpugurly hyzmatdaşlygy mundan beýläk-de ösdürmegiň geljekki ugurlaryny giňişleýin ara alyp maslahatlaşdylar.

Gepleşikleriň barşynda esasy üns ulag-logistika pudagynda strategik hyzmatdaşlygy pugtalandyrmaga, sebitara we halkara ähmiýetli ulag geçelgeleriniň üstaşyr geçirijilik mümkinçiliklerini has-da giňeltmäge gönükdirildi. Iki ýurduň döwrebap ulag infrastrukturalaryndan has netijeli peýdalanmagyň hem-de ýük dolanyşygynyň mukdaryny artdyrmagyň sebitdäki ykdysady integrasiýa goşýan goşandy aýratyn bellenildi.

Şeýle-de, duşuşykda halkara ulag we tranzit başlangyçlarynyň çäklerinde özara bähbitli gatnaşyklary dowam etdirmek boýunça pikir alyşyldy. Taraplar multimodal daşamalary we serhet-gümrük geçiş amallaryny kämilleşdirmegiň möhümdigini nygtadylar.

Duşuşygyň ahyrynda taraplar özara bähbitli we hormat goýmaga esaslanýan, hoşniýetli goňşuçylyk ýörelgelerine ygrarly türkmen-eýran hyzmatdaşlygyny täze belentliklere götermek baradaky meýillerini tassykladylar.