2025-nji ýylyň 5-nji awgustynda Türkmenistanyň Prezidenti Serdar Berdimuhamedow bilen Gruziýanyň Premýer-ministri Irakli Kobahidze "Awaza" milli syýahatçylyk zolagynda geçirilýän Birleşen Milletler Guramasynyň Deňze çykalgasy bolmadyk ösüp barýan ýurtlar boýunça üçünji maslahatyň (LLDC3) çäklerinde duşuşyk geçirdiler. Bu barada Gruziýanyň resmi metbugaty habar berýär.

Duşuşygyň dowamynda taraplar türkmen-gruzin hyzmatdaşlygynyň häzirki ýagdaýy boýunça pikir alyşdylar. Söwda-ykdysady ulgamda hyzmatdaşlygy giňeltmek ugrunda uly mümkinçilikleriň bardygy bellenildi. Hususan-da, energetika ulgamyndaky hyzmatdaşlygyň oňyn depginde ösýändigi we türkmen tebigy gazyny Ýewropa ýurtlaryna ibermekde "Günorta gaz geçirijisiniň" mümkinçilikleriniň ulanylmagynyň geljegi ara alnyp maslahatlaşyldy.

Taraplar sebitde parahatçylygyň we durnuklylygyň üpjün edilmegi bilen baglanyşykly meselelere aýratyn üns berdiler. Sebitde howpsuzlygyň pugtalandyrylmagy ugrunda tagallalary birleşdirmäge taýýardyklaryny tassykladylar.

Şol gün Türkmenistanyň Prezidenti Serdar Berdimuhamedow Azerbaýjan Respublikasynyň Premýer-ministri Ali Asadow bilen hem duşuşyk geçirdi.

"Awazada" geçirilýän halkara forumda dünýäniň 100-den gowrak ýurdunyň döwlet we hökümet ýolbaşçylary, 50-ä golaý halkara guramanyň wekilleri, şeýle hem 20-den gowrak öňdebaryjy kärhanalarynyň ýolbaşçylary gatnaşýarlar. Bu möhüm çäräniň giňden beýan edilmegini üpjün etmek maksady bilen, dünýäniň 40-a golaý döwletinden 160-dan gowrak metbugat wekili ýygnandy.