Türkmenistanyň Halk Maslahatynyň Başlygy, türkmen halkynyň Milli Lideri Gurbanguly Berdimuhamedow Deňze çykalgasy bolmadyk ösüp barýan ýurtlar boýunça BMG-niň üçünji maslahatyna gatnaşmak üçin ýurda gelen Tatarystan Respublikasynyň Baştutany Rustam Minnihanow bilen duşuşyk geçirdi. Bu barada sişenbe güni Tatarystan Respublikasynyň Baştutanynyň resmi metbugaty habar berdi.

Duşuşygyň dowamynda taraplar Türkmenistan bilen Tatarystanyň arasynda dürli ugurlar boýunça dostlukly gatnaşyklary hem-de hyzmatdaşlygy mundan beýläk-de ösdürmek meselelerini ara alyp maslahatlaşdylar. Iki ýurduň arasyndaky hyzmatdaşlygyň pugtalandyrylmagyna gyzyklanma bildirilýändigi tassyklanyldy.

Deňze çykalgasy bolmadyk ýurtlar (LLDC) deňiz ýollaryna göni çykalganyň ýoklugy sebäpli söwda, ulag baglanyşygy we ösüş ugurlarynda birnäçe kynçylyklar bilen ýüzbe-ýüz bolýar. Bu ýagdaýlar ýokary çykdajylara we ýük daşamalaryň gijikmegine sebäp bolýar. Şunuň bilen birlikde, bu ýurtlarda işjeň jemgyýetler we uly ykdysady mümkinçilikler bar.

BMG-niň Deňze çykalgasy bolmadyk ösüp barýan ýurtlar boýunça geçirilýän üçünji maslahaty bu ýurtlaryň öňünde durýan meseleleri çözmekde hem-de mümkinçilikleri durmuşa geçirmekde täsirli çözgütleriň we hyzmatdaşlygyň ýola goýulmagy üçin halkara meýdança bolup hyzmat edýär.