Özbegistanyň Prezidenti Şawkat Mirziýoýewe “Awaza” Milli syýahatçylyk zolagynda geçirilýän BMG-niň Deňze çykalgasy bolmadyk ösüp barýan ýurtlar boýunça üçünji halkara maslahatynyň (LLDC3) çäklerinde geçirilen dabarada Türkmenistanyň “Hyzmatdaşlygy ösdürendigi üçin” ordeni bilen sylaglanyldy. Bu barada Özbegistanyň Prezidentiniň metbugat gullugy duşenbe güni habar berdi.

Şawkat Mirziýoýew Türkmenistanyň Halk Maslahatynyň Başlygy, türkmen halkynyň Milli Lideri Gurbanguly Berdimuhamedowa we Türkmenistanyň Prezidenti Serdar Berdimuhamedowa hem-de doganlyk türkmen halkyna çuňňur hoşallyk bildirip, berlen sylagyň iki ýurduň arasyndaky özara düşünişmegiň, dost-doganlygyň we ýakyn hyzmatdaşlygyň nyşanydygyny nygtady.

Özbegistanyň Döwlet Baştutany iki ýurduň baý taryhy we medeni gatnaşyklaryna esaslanýan strategik hyzmatdaşlygyň ýokary derejesini belläp geçip, soňky ýyllarda amala aşyrylan möhüm ykdysady we ynsanperwerlik taslamalaryň netijesinde söwda-ykdysady gatnaşyklaryň hem-de hyzmatdaşlygyň möçberiniň ep-esli artandygyny aýtdy.

Şeýle-de Mirziýoýew sözüniň ahyrynda türkmen halkyny BMG-niň maslahatynyň geçirilmegi bilen gutlady we 2025-nji ýylyň dekabrynda Aşgabatda geçiriljek “Halkara parahatçylyk we ynanyşmak ýylyna” bagyşlanan ählumumy sammitiň hem üstünlikli geçirilmegini arzuw etdi.