Türkmenistanyň Maliýe we ykdysadyýet ministrligi döwlet eýeçiligindäki 28 desgany satmak boýunça bäsleşikli söwdanyň geçirilýändigini yglan etdi.

Hususylaşdyrmaga degişli döwlet emläkleriniň sanawy anna güni “Neýtralnyý Türkmenistan” gazetinde çap edildi. Bäsleşikli söwda 2025-nji ýylyň 22-nji awgustynda döwlet eýeçiligindäki desgalary satmak boýunça sanly ulgam hem-de onuň mobil goşundysy arkaly geçiriler.

Bäsleşikli söwda çykaryljak iri desgalaryň hatarynda Lebap welaýatynyň Dänew etrabynyň Berzeň geňeşliginiň Hendekli obasynda ýerleşýän, 3 müň 967 inedördül metr meýdanly bişen kerpiç öndürýän sehi, 8 müň 800 inedördül metr meýdanly “Döwrebap” söwda-dynç alyş merkezi, Lebap welaýatyndaky iki gatly bina, şeýle hem Daşoguz welaýatyndaky 6 müň 400 inedördül metr meýdanly turba zawody bar.

Bäsleşikli söwda şeýle hem hyzmat ediş desgalary, şol sanda dükanlar, kafeler, naharhanalar, edara binalary we önümçilik kärhanalary hödürleniler.
Bäsleşikli söwda Türkmenistanyň we daşary döwletleriň raýatlary hem-de Türkmenistanyň we beýleki ýurtlaryň döwlete dahylly bolmadyk ýuridiki şahslary göz öňünde tutulan kanunçylyk tertibine laýyklykda gatnaşyp bilerler.

Bäsleşikli söwda gatnaşmagyň tertibi barada maslahatlar we hususylaşdyrylýan desgalar barada goşmaça maglumatlar Türkmenistanyň Maliýe we ykdysadyýet ministrliginiň emläk gatnaşyklary we telekeçiligi goldamak bölümi we bu ministrligiň welaýatlardaky we Aşgabat şäherindäki ugurdaş bölümleri tarapyndan berilýär.