Tatarystan Respublikasynyň Baştutany Rustam Minnihanow penşenbe güni Sankt-Peterburg halkara ykdysady forumynyň çäklerinde Türkmenistanyň Ministrler Kabinetiniň Başlygynyň orunbasary Nökerguly Atagulyýew bilen duşuşyk geçirdi. Bu barada Tatarystanyň Baştutanynyň metbugat gullugy habar berdi.

Duşuşygyň dowamynda Minnihanow rus-türkmen gatnaşyklarynyň çäklerinde sebitara hyzmatdaşlyga yzygiderli goldaw berilýändigi üçin türkmen halkynyň Milli Lideri Gurbanguly Berdimuhamedowa minnetdarlyk bildirdi.

Tatarystanyň Baştutanynyň bellemegine görä, iki döwletiň arasynda gadymy taryhy we medeni gatnaşyklardan başga-da, durnukly söwda-ykdysady hyzmatdaşlyk bar. Türkmenistanyň bazarynda “KAMAZ”, Kazan dikuçary zawody, Maksim Gorkiý adyndaky Zeleinodolsk gämigurluşyk zawody, KER-Holding we “Eýdos” ýaly öňdebaryjy tatar kärhanalary üstünlikli işleýär.

Rustam Minnihanow  2024-nji ýylyň jemlerine görä, Tatarystan bilen Türkmenistanyň arasyndaky haryt dolanyşygy 39 million ABŞ dollaryndan geçendigini aýtdy.

“Ykdysady hyzmatdaşlygymyza has-da ýokary depgin bermeli. Nebit gözleg, gaz transporty, awtoulag, awiasiýa, gämigurluşyk we himiýa önümleriniň iberilişi ýaly ugurlarda hyzmatdaşlygyň ösdürmek üçin uly mümkinçilik bar” diýip, Rustam Minnihanow nygtady.

Taraplar ynsanperwer hyzmatdaşlygyň meselelerine aýratyn üns berdiler. Tatarystanyň Baştutany ylym, bilim we medeniýet ugurlarynda hyzmatdaşlygyň ösüşi üçin uly mümkinçilikleriň bardygyny belledi.

XXVIII Sankt-Peterburg halkara ykdysady forumy 2025-nji ýylyň 18–21-nji iýuny aralygynda Sankt-Peterburg şäherinde geçirilýär.