“Aýdyň Gijeler” hojalyk jemgyýeti “Ak şäherim Aşgabat” atly XXIV köpugurly halkara sergisinde öndürip başlan gün energiýasy arkaly işleýän ýol yşyklary ilkinji gezek görkezildi. Bu barada Türkmenistanyň resmi metbugaty ýekşenbe gübi habar berdi.

Şeýle hem kärhana şähergurluşyk üçin zerur bolan kabelleri, yşyklandyryjylary, ýol germewleri bilen tanyşdyrdy.

“Aýdyň Gijeler” hojalyk jemgyýeti bilen Hytaý Halk Respublikasynyň öňdebaryjy kompaniýalarynyň arasynda 2025–2030-njy ýyllary öz içine alýan strategik hyzmatdaşlyk gatnaşyklaryny ýola goýmak maksady bilen, ikitaraplaýyn şertnama gol çekişmek dabarasy geçirildi.

Habarda bellenilişi ýaly, “Aýdyň Gijeler” hojalyk jemgyýetiniň Hytaý Halk Respublikasynyň öňdebaryjy kompaniýalary bilen gazanan bu ylalaşyklary ýurdumyzda milli elektron senagatyny mundan beýläk-de ösdürmek maksadynda täze, döwrebap belent sepgitleriň nazarlanýandygyna aýdyň şaýatlyk edýär.

Türkmenistanyň Senagat we gurluşyk önümçiligi ministrliginiň gatnaşmagynda 2016-njy ýylda döredilen “Aýdyň gijeler” hojalyk jemgyýeti elektrotehnikalary we elektron harytlary ýurtda ilkinji bolup öndürip başlan kärhanalaryň biridir.