Ýakyn Gündogarda ýagdaýyň ýitileşmegi bilen baglylykda, Türkmenistan häzirki wagtda Eýranda bolýan daşary ýurt diplomatlaryň, olaryň maşgala agzalarynyň we beýleki raýatlaryň üstaşyr geçmegi üçin öz çägini üpjün etmek boýunça degişli çäreleri görýär. Bu barada Türkmenistanyň Daşary işler ministrligi ýekşenbe güni habar berdi.

Maglumata görä, häzirki güne çenli Türkmenistanyň döwlet serhedinde ýerleşýän barlag-geçiriş nokatlary arkaly takmynan 120 adam – Gazagystanyň, Gyrgyzystanyň, Özbegistanyň, Täjigistanyň, Rumyniýanyň we beýleki birnäçe ýurtlaryň raýatlary geçdi.

Habarda bellenilişi ýaly, Türkmenistana gelen bu daşary ýurt raýatlary awtoulag, iýmit, myhmanhana otaglary hem-de ilkinji zerurlyk serişdeleri bilen üpjün edildi.

Ynsanperwerlik maksatly bu işi durmuşa geçirmekde Türkmenistanyň döwlet edaralary daşary ýurtlaryň diplomatik wekilhanalary we halkara guramalar bilen ýakyndan hyzmatdaşlyk edýärler.

Şeýlelikde, Türkmenistan ynsanperwerlik, halkara hyzmatdaşlyk we goňşuçylyk ýörelgelerine ygrarlydygyny iş ýüzünde tassyklaýar. Bu bolsa, Türkmenistanyň başlangyjy bilen BMG-niň Baş Assambleýasy tarapyndan yglan edilen Halkara parahatçylyk we ynanyşmak ýylynda aýratyn ähmiýete eýedir.