Merkezi Aziýa ýurtlarynyň döwlet Baştutanlary we Hytaýyň Başlygy Si Szinpin 17-nji iýunda Gazagystanyň paýtagty Astana şäherinde geçiriljek “Merkezi Aziýa — Hytaý” formatyndaky ikinji sammite gatnaşarlar. Bu barada Gazagystan Prezidentiniň metbugat gullugynyň Telegram sahypasynda habar berildi.

Hytaýyň Başlygy Si Szinpiniň kärdeşi Kasym-Žomart Tokaýewiň çakylygy boýunça 16–17-nji iýunda resmi sapar bilen Gazagystana barmagy meýilleşdirilýär. Liderler Gazagystan bilen Hytaýyň arasyndaky giňişleýin strategik hyzmatdaşlygy çuňlaşdyrmagyň ýollaryny maslahatlaşmak üçin ikitaraplaýyn gepleşik geçirerler.

17-nji iýunda geçiriljek sebitleýin sammiti Merkezi Aziýanyň bäş döwletiniň ýagny Gazagystanyň, Gyrgyzystanyň, Täjigistanyň, Türkmenistanyň we Özbegistanyň hem-de Hytaýyň Liderini bir ýere jemlär we onda sebitleýin hyzmatdaşlyk we ösüş meseleleri boýunça pikir alşarlar.

“Merkezi Aziýa — Hytaý” Liderleriniň ilkinji sammiti 2023-nji ýylyň 18–19-njy maýynda Hytaýyň demirgazyk-günbataryndaky Şensi welaýatynyň Siýan şäherinde geçirildi.