Türkmenistanyň Ministrler Kabinetiniň Başlygynyň orunbasary Hojamyrat Geldimyradow Russiýanyň güni mynasybetli Aşgabatda geçirilen resmi kabul edilişikde Türkmenistan bilen Russiýanyň arasyndaky ýyllyk haryt dolanyşygynyň 1,6 milliard ABŞ dollaryndan geçendigini aýtdy.

Russiýa Federasiýasynyň ilçihanasy tarapyndan guralan bu çärä diplomatlar, döwlet edaralarynyň wekilleri hem-de medeni jemgyýetçilik guramalarynyň işgärleri gatnaşdy. Bu barada Türkmenistanyň resmi metbugaty habar berdi.

Hojamyrat Geldimyradow türkmen hökümetiniň adyndan çykyş etmek bilen Türkmenistanyň Garaşsyzlygyny alany bäri iki ýurduň arasyndaky söwda dolanyşygynyň möçberiniň 60 milliard ABŞ dollaryndan geçendigini we 2025-nji ýylyň ilkinji alty aýynda bolsa haryt dolanyşygynyň 58 göterim ýokarlandygyny aýtdy.

Wise-premýer energetika, ulag we sanly ykdysadyýetiň geljegi uly ugurlaryň biri bolup galýandygyny aýtdy we bilim, ylym hem-de medeniýet ulgamyndaky üstünlikli hyzmatdaşlygy belläp geçdi.

Russiýanyň Türkmenistandaky ilçisi Iwan Wolynkin myhmanlary garşy alyp, Russiýanyň güniniň agzybirligiň we nesilleriň arasyndaky arabaglanyşygyň nyşanydygyny belledi. Ol iki ýurduň arasyndaky hyzmatdaşlygyň berk dost-doganlyk däplerine we umumy taryha esaslanýandygyny aýtdy.

“Syýasy we ykdysady gatnaşyklarymyz bilen bir hatarda medeni-ynsanperwer hyzmatdaşlyk hem ösdürilýär” diýip, Wolynkin belledi we iýun aýynyň ahyrynda Russiýanyň daşary işler ministri Sergeý Lawrowyň resmi sapar bilen Türkmenistana geljekdigini mälim etdi.

Baýramçylygyň ahyrynda myhmanlar konsert maksatnamasyna tomaşa etdiler. Rus halk aýdymlary we tanslary, şeýle hem türkmen halkynyň Milli Lideri Gurbanguly Berdimuhamedowyň “Öňe, diňe öňe, jan Watanym— Türkmenistan!” atly aýdymy türkmen dilinde ýerine ýetirildi.