Türkmenistanyň paýtagty Aşgabat şäherinde ýerleşýän ýurduň Söwda-senagat edarasynyň sergiler merkezinde çarşenbe güni “Turkmentextile Expo — 2025” atly halkara sergi-ýarmarka öz işine başlady.

Türkmenistanyň Prezidenti Serdar Berdimuhamedow ýurtda ilkinji gezek geçirilýän “Turkmentextile Expo — 2025” atly halkara sergi-ýarmarkanyň öz işine başlamagy bilen tüýs ýürekden gutlady. Bu barada Türkmenistanyň resmi metbugaty çarşenbe güni habar berdi.

“Sergi-ýarmarkanyň ekspozisiýalarynda diňe bir içerki bazar üçin däl, eýsem, eksporta niýetlenen ýüpek matalaryň, lybaslaryň we beýleki dokma önümleriniň hem bolmagy bu giň möçberli çärä gatnaşýan daşary ýurtly hyzmatdaşlaryň ünsüni özüne çeker hem-de bu ugurda Türkmenistanyň daşary ýurt maýa goýumlaryna açykdygyny aýdyň görkezer” diýlip, Türkmenistanyň döwlet Baştutany gutlag hatynda belledi.

Sergide dokma senagatynyň giň ugurlary – tebigy süýümleri gaýtadan işlemek, egin-eşik we aýakgap önümçiligi, öý dokma önümleri, ätiýaçlyk şaýlary, himiki serişdeler we boýaglar, bezeg önümleri ýaly dürli ugurlar görkezilýär. Şeýle hem sergä gatnaşýan kompaniýalar tarapyndan iň täze innowasion tehnologiýalar hödürlenýär

“Turkmentextile Expo — 2025” atly halkara sergi-ýarmarka 13-nji iýuna çenli dowam eder.

Suratlar: THP