Türkmenistanyň daşary işler ministri Raşid Meredow penşenbe güni Hindistanyň Premýer-ministri Narendra Modi bilen Merkezi Aziýanyň daşary işler ministrleriniň bilelikdäki duşuşygyna gatnaşdy. Bu barada Türkmenistanyň Daşary işler ministrligi habar berdi.

Duşuşykda gatnaşyjylar Hindistan bilen Merkezi Aziýa döwletleriniň arasynda açyk we netijeli dialogyň we aýratyn hem döwlet derejesindäki ýokary derejeli gatnaşyklaryň möhümdigini nygtadylar.

Gepleşikleriň dowamynda söwdany giňeltmek, maýa goýumlary artdyrmak hem-de ulag, energetika, senagat, ýokary tehnologiýalar, saglygy goraýyş we derman senagaty ugurlarynda bilelikdäki taslamalary amala aşyrmak üçin giň mümkinçilikleriň bardygy bellenildi.

Duşuşykda Türkmenistan–Owganystan–Pakistan–Hindistan (TOPH) gaz geçirijisine aýratyn üns berildi. Gatnaşyjylar bu strategiýa taýdan ähmiýetli sebit başlangyjyny amala aşyrmak ugrunda tagallalary işjeňleşdirmegiň zerurdygyny nygtadylar.

Türkmenistanyň daşary işler ministri Raşid Meredow “Merkezi Aziýa – Hindistan” dialogynyň dördünji duşuşygynda, 2025-nji ýylyň 6-njy iýuny, Nýu-Deli, Hindistan (Surat: Türkmenistanyň DIM-i)

Hindistan bilen Merkezi Aziýanyň arasynda ulag baglanyşyklaryny ösdürmegiň möhümdigi hem bellenilip geçildi. Bu ugurda Ýakyn Gündogar, Hazar sebiti we Ýewropa bilen integrasiýanyň zerurlygy nygtaldy. Şunuň bilen birlikde, halkara Demirgazyk-Günorta ulag geçelgesi geljekki logistika hyzmatdaşlygynyň möhüm bölegi hökmünde görkezildi.

Duşuşygyň ahyrynda Hindistan bilen Merkezi Aziýa ýurtlarynyň arasynda syýasy-diplomatik gatnaşyklary çuňlaşdyrmaga, söwda we ynsanperwer alyş-çalyşlaryň giňeldilmegine bolan bilelikdäki ygrarlylyk tassyklanyldy.

Türkmenistanyň daşary işler ministri Raşid Meredow 2025-nji ýylyň 6-njy iýunynda Nýu-Deli şäherinde geçirilen “Merkezi Aziýa – Hindistan” dialogynyň dördünji duşuşygyna gatnaşdy.