Türkmenistanyň paýtagty Aşgabat şäherinde hem-de ýurduň ähli welaýatlarynda Gurban baýramy giňden bellenilýär.

Türkmenistanyň Prezidenti Serdar Berdimuhamedow türkmen halkyny umumadamzat gymmatlyklaryny baýlaşdyrýan hem-de belent ynsanperwerlik gatnaşyklaryny pugtalandyrýan Gurban baýramy bilen tüýs ýürekden gutlady. Bu barada Türkmenistanyň resmi metbugaty anna güni habar berdi.

“Türkmenistanyň hemişelik Bitaraplygynyň 30 ýyllyk şanly baýramynyň giňden we dabaraly bellenýän ýylynda hem yslam dünýäsiniň merkezi bolup durýan iki mukaddeslikde — Mekge şäherindäki keramatly Käbede hem-de Medine şäherindäki Muhammet pygamberiň metjidinde tagat-ybadatlaryny, haj parzlaryny berjaý etmekleri üçin watandaşlarymyzyň müňlerçesini Saud Arabystany Patyşalygyna zyýarata iberdik” diýip, Türkmenistanyň döwlet Baştutany gutlag hatynda belledi.

Şeýle hem Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Türkmenistanyň Prezidenti Serdar Berdimuhamedowy yslam dünýäsiniň esasy baýramlarynyň biri, ruhy bitewüligi, jebisligi we asylly maksatlary özünde jemleýän mukaddes Gurban baýramy mynasybetli türkmen halkynyň hem-de Türkmenistanyň Halk Maslahatynyň adyndan tüýs ýürekden gutlady.

Gurban baýramynyň ilkinji gününde ýurduň ähli welaýatlarynda baýram namazy okalyp, ýagşy doga-dilegler edildi we baýramçylyk mynasybetli dabaralar geçirildi.

Türkmenistanyň Prezidenti Serdar Berdimuhamedow Gurban baýramyny 6-7-8-nji iýunda bellemek we 8-nji iýundaky dynç gününi 9-njy iýuna — duşenbe gününe geçirmek hakynda Permana gol çekdi.