Birleşen Milletler Guramasynyň Baş Assambleýasynyň 79-njy sessiýasynyň 2025-nji ýylyň 4-nji iýunynda geçirilen 75-nji umumy mejlisinde Türkmenistan BMG-niň Ykdysady we Durmuş Geňeşiniň 2026-2028-nji ýyllar döwri üçin agzalygyna saýlanyldy. Bu barada Türkmenistanyň daşary işler ministrligi çarşenbe güni habar berdi.

ECOSOC Birleşen Milletler Guramasynyň we onuň ulgamyna girýän edaralaryň ykdysady we durmuş işini utgaşdyrmaga jogapkär esasy düzümleriň biri bolup durýar. ECOSOC durnukly ösüşiň üç ölçegini – ykdysady, durmuş we daşky gurşaw ölçeglerini ilerletmekde BMG-niň ulgamynda merkezi orny eýeleýär.

ECOSOC 54 döwletden düzülip, olar Baş Assambleýa tarapyndan üç ýyl möhlete saýlanylýar. Her ýyl möhleti dolan ýurtlary çalyşmak maksady bilen sebitleýin toparlardan 18 ýurt saýlanylýar.

Türkmenistan öň 2013-2015 we 2019-2021-nji ýyllar döwri üçin ECOSOC-yň agzalygyna saýlanylypdy.