Daşky gurşawy goramagyň bütindünýä güni mynasybetli 2025-nji ýylyň 5-nji iýunynda Osaka şäherinde “EKSPO-2025” Bütindünýä sergisindäki Türkmenistanyň Milli pawilýonynda “Ekologiýa abadançylygy-ösüşiň möhüm şerti” atly maslahaty geçirildi.

Bu çärä Türkmenistanyň Ýaponiýadaky Ilçisi Atadurdy Baýramow, Türkmenistanyň Daşky gurşawy goramak ministrliginiň wekilleri, şeýle hem “EKSPO-2025” Bütindünýä sergisiniň guramaçylyk komitetiniň wekilleri we sergini görmäge gelýän adamlar gatnaşdylar.

“EKSPO-2025” Bütindünýä sergisindäki Türkmenistanyň Milli pawilýonynda gurnalan “Ekologiýa abadançylygy-ösüşiň möhüm şerti” atly maslahat, 2025-nji ýylyň 5-nji iýuny, Osaka, Ýaponiýa (Surat: Türkmenistanyň Ýaponiýadaky Ilçihanasy)

Maslahata gatnaşyjylar öz çykyşlarynda Türkmenistanyň daşky gurşawy goramak boýunça ekologiýa taýdan arassa tehnologiýalary ornaşdyrmak ugrundaky tagallalaryny doly goldaýandygyny we howanyň üýtgemegine garşy göreşmek baradaky meseleleriniň Türkmenistanyň hökümetiniň gün tertibinde esasy orun eýeleýändigini bellediler.

Habarda bellenilişi ýaly, Türkmenistanyň Prezidenti Serdar Berdimuhamedow
2023-nji ýylyň 1-nji dekabrynda Dubaýda geçirilen BMG-niň Howanyň üýtgemegi baradaky Çarçuwaly konwensiýasyna gatnaşyjy taraplaryň 28-nji konferensiýasynda Türkmenistanyň Ählumumy metan borçnamasyna goşulýandygyny yglan etdi. Türkmenistanda pes uglerodly tehnologiýalaryň ornaşdyrylmagyny höweslendirmek boýunça zerur bolan hukuk binýadyny ösdürmek işleri dowam etdirilýär.