Türkmenistanyň Prezidenti Serdar Berdimuhamedow çarşenbe güni sanly ulgam arkaly geçirilen Ministrler Kabinetiniň mejlisinde Ykdysady hyzmatdaşlyk boýunça hökümetara türkmen-rus toparynyň türkmen böleginiň täze düzümi bilen bagly degişli resminama gol çekdi.

Türkmenistanyň resmi metbugatynyň habar bermegine görä, bu resminama Türkmenistan bilen Russiýa Federasiýasynyň arasynda gazanylan ikitaraplaýyn ylalaşyklary durmuşa geçirmek hem-de iki ýurduň özara gatnaşyklaryny mundan beýläk-de ösdürmek maksady bilen kabul edildi.

Türkmenistanyň döwlet Baştutany mejlisiň dowamynda jemi içerki önümiň ösüşi hasabat döwründe 6,3 göterim derejede durnukly saklanyp gelýändigini we ýurtda kabul edilen ähli maksatnamalaryň üstünlikli durmuşa geçirilýändigini aýtdy.

Türkmenistanyň Ministrler Kabinetiniň mejlisinde şu ýylyň bäş aýynda ýurtda alnyp barlan işleriň jemleri jemlenildi.