Türkmenistanyň Prezidenti Serdar Berdimuhamedow Li Çže Mýona Koreýa Respublikasynyň Prezident saýlawlarynda ýeňiş gazanmagy mynasybetli tüýs ýürekden gutlaglaryny iberdi. Bu barada Türkmenistanyň resmi metbugaty çarşenbe güni habar berdi.

Türkmenistanyň döwlet Baştutany gutlag hatynda Koreýa Respublikasy bilen ýola goýlan netijeli gatnaşyklara ýokary baha berip, özara bähbitli hyzmatdaşlygy mundan beýläk-de ösdürmek boýunça bilelikde tagalla etmäge taýýardygyny tassyklady.

Türkmenistanyň Prezidenti pursatdan peýdalanyp, Li Çže Mýona berk jan saglyk, bagtyýarlyk we jogapkärli döwlet işinde täze üstünlikleri, Koreýanyň halkyna bolsa parahatçylyk, rowaçlyk we gülläp ösüş arzuw etdi.

Koreýa Respublikasynda nobatdan daşary geçirilen Prezident saýlawlarynyň netijesine görä, Li Çže Mýon ses berijileriň 49,42 göterimini gazanyp, Konserwatiw güýçler partiýasynyň wekili Kim Mun Sudan (41,15 göterim) öňe geçdi.