“Aýdyň Gijeler” türkmen kärhanasy 2025-nji ýylyň 24-25-nji maýynda türkmen paýtagtynda geçirilen “Ak şäherim Aşgabat” atly XXIV köpugurly halkara sergide Androide esaslanýan 10, 12 we 13 dýuýmlyk portatiw planşetlerini tanyşdyrdy. Bu barada Türkmenistanyň resmi metbugaty habar berýär. 

Planşetlerde 6 gigabaýtlyk operatiw ýat we 128 gigabaýtlyk içerki maglumat ýat ornaşdyrylyp, çehol görnüşli oňaýly klawiatura bilen üsti ýetirilýär. Enjam işewür saparlarynda we duşuşyklaryň dowamynda ulanmak üçin niýetlenendir. 

Elektron tehnikalary öndürmäge ýöriteleşen “Aýdyň Gijeler” tarapyndan işlenilip taýýarlanylan emeli aňly Aýgül atly robot serginiň esasy gymmatlyklarynyň biri boldy. Zenan sesli robot sergä gelenleriň soraglaryna jogap berdi hem-de interaktiw görnüşde kompaniýanyň önümleri bilen tanyşdyrdy.

“Aýdyň Gijeler” hojalyk jemgyýetiniň diwarlygy “Ak şäherim Aşgabat” atly XXIV köpugurly halkara sergide, 2025-nji ýylyň 24-25-nji maýy, Aşgabat, Türkmenistan (Surat: BT)

Kärhananyň wekilleriniň bellemegine görä, Aýgül türkmen dilinde gürleşip bilýän emeli aňyň synag nusgasydyr. Robotyň hyzmatlaryny giňeltmek we ony mundan beýläk-de kämilleşdirmek işläp düzüjileriň meýilnamalarynda duran wezipelerdir.

“Aýdyň Gijeler” hojalyk jemgyýetiniň “Ak şäherim Aşgabat” atly sergä gatnaşmagy onuň Türkmenistanyň elektron tehnologiýalar ulgamynda kuwwatlyklarynyň barha artýandygyny we ýurduň gündelik durmuşda öňdebaryjy innowasiýalary ornaşdyrmaga çalyşýandygyny görkezýär.