Kiýew şäherindäki Magtymguly adyndaky kitaphanada Türkmen halysynyň baýramy mynasybetli Türkmenistanyň ilçihanasynyň wekilleriniň, döredijilik bilen meşgullanýan ýaşlaryň we bu ýurtda ýaşaýan türkmenleriň gatnaşmagynda medeni çäre geçirildi. Bu barada Türkmenistanyň Ukrainadaky ilçihanasy habar berýär.

“Kümüş tahýa” ady bilen geçirilen sergi medeni çäräniň maksatnamasynyň esasy bölegini emele getirdi. Onda “Mistestwoznawsi” ýaş suratkeşler birleşmesiniň agzalarynyň işleri görkezildi. Ýaşlar özleriniň surat eserlerinde türkmen halk ertekileriniň gahrymanlaryny, tebigat gözelliklerini we milli äheňleri şöhlelendirdiler.

Diplomatik wekilhananyň işgärleri türkmen halysynyň halkyň medeniýetinde eýeleýän orny, onuň ÝUNESKO-nyň gymmatlygy hökmünde ykrar edilmegi hem-de milli buýsanjyň nyşany hökmünde bu baýramyň ähmiýeti barada gürrüň berdiler. Medeni alyşmalaryň we halklaryň arasyndaky dostlugyň möhüm ähmiýeti barada hem durlup geçildi.

Myhmanlara türkmen halylary baradaky wideoşekiller we ukrain dilindäki “Iki Mergen” atly erteki ýazgysy görkezildi. Şeýle hem amaly-haşam sungatynyň sergisi we Magtymgulynyň muzeý otagy boýunça tanyşdyrylyş gezelenji guraldy.

Çäräniň ahyrynda ýaşlara Türkmenistanyň ilçihanasynyň adyndan ýadygärlik sowgatlar gowşuryldy.