Türkmenistan özüniň hemişelik Bitaraplyk hukuk derejesini energiýa serişdeleriniň eksport ugurlarynyň diwersifikasiýalaşdyrmak üçin syýasatynyň möhüm guraly hökmünde garaýar. Bu barada Türkmenistanyň Russiýa Federasiýasyndaky Adatdan daşary we Doly ygtyýarly Ilçisi Esen Aýdogdyýew 2025-nji ýylyň 6-njy awgustynda russiýanyň “Nasionalnaýa oborona” žurnalynda çap edilen makalasynda beýan edilýär.

Diplomatyň bellemegine görä, Türkmenistan Bitaraplygyň geoykdysady ölçeglerine, şol sanda energiýa serişdeleriniň iberilişiniň giňeldilmegine aýratyn üns berýär. Türkmenistanyň Bitaraplyk derejesi ýurduň energiýa serişdeleriniň eksportynyň çäklendirmelere we syýasy bloklara gatyşmaýandygyna kepillik hökmünde çykyş edýär.

Esen Aýdogdyýew Türkmenistanyň tebigy serişdeleri we strategik ýerleşişi sebitleýin energetika hyzmatdaşlygynda amatly şertleri döredýändigini belledi. Şeýle hem hyzmatdaş ýyrtlaryň uglewodorod çeşmelerine we olary daşamak üçin niýetlenen infrastruktura deňhukukly elýeterliligi üpjün etmek meselelerini öňe sürdi we bu ýagdaýyň Ýewraziýa giňişliginde energiýa durnuklylygyny saklamak üçin zerur bolup durýandygyny aýtdy.

Diplomat Türkmenistanyň üstünlikli durmuşa geçirýän infrastruktura taslamalaryna, şol sanda Türkmenistan — Hytaý we Türkmenistan — Eýran gaz geçirijilerine ünsi çekdi. Şeýle hem ol Türkmenistan — Owganystan — Pakistan — Hindistan (TAPI) gaz geçirijisiniň gurluşygynyň ýurduň uzak möhletleýin eksport strategiýasynyň möhüm halkasydygyny aýtdy. Bu taslama gatnaşýan ýurtlar hem-de halkara maliýe guramalary, şol sanda Aziýa Ösüş banky tarapyndan doly goldanylýar.

Türkmenistanyň resmi metbugatynyň habar bermegine görä, ýurduň tebigy gaz boýunça subut edilen gorlary 50 trillion kub metrden geçýär. Bu Türkmenistanyň dünýäde Russiýadan, Eýrandan we Katardan soň görkezijiler boýunça dördünji orunda durýandygyny tassyklaýar.