Türkmenistanyň Senagatçylar we telekeçiler birleşmesiniň binasynda 4-nji iýulda hususy we döwlet iş berijileriniň gatnaşmagynda iş orunlarynyň ýarmarkasy geçiriler. Bu barada penşenbe güni çap edilen “Neýtralnyý Turkmenistan” gazetinde habar berilýär.

Çäre Bagtyýarlyk, Berkararlyk, Büzmeýin we Köpetdag etraplarynyň zähmet we ilaty iş bilen üpjünçilik bölümleri, Türkmenistanyň Senagatçylar we telekeçiler birleşmesiniň Aşgabat şäher komiteti bilen bilelikde gurnaýarlar.

Ýarmarka sagat 9:00-dan 12:00-a çenli aralykda geçiriler. Aşgabat şäheriniň iş berijileri bar bolan boş iş orunlary baradaky maglumatlary iberip, bu çärä gatnaşyp bilerler.

Iş gözleýän raýatlar bilen gürrüňdeşlik geçiriler we zähmet bazaryndaky häzirki teklipler bilen tanyşmak mümkinçiligi bolar. Şeýle hem ýarmarka şahsyýetini tassyklaýan resminama — pasport we zähmet depderçesi bilen gelmek zerurdyr.