Türkmenistanyň daşary işler ministri Raşid Meredow 22-nji iýunda ABŞ-nyň Döwlet sekretarynyň birinji orunbasary Kristofer Landau bilen telefon arkaly söhbetdeşlik geçirdi. Söhbetdeşlik amerikan tarapynyň başlangyjy bilen gurnaldy. Bu barada Türkmenistanyň Daşary işler ministrligi habar berdi.

Söhbetdeşligiň dowamynda taraplar Türkmenistanyň we Amerikanyň Birleşen Ştatlarynyň arasyndaky syýasy, söwda-ykdysady, ynsanperwer we medeni ugurlary öz içine alýan hyzmatdaşlygyň oňyn we durnukly häsiýetini bellediler.

Taraplar sebitleýin we halkara derejedäki möhüm meseleleri, şol sanda Ýakyn Gündogardaky ýagdaýlary ara alyp maslahatlaşdylar. Şeýle-de, ynsanperwer meselelerine we diplomatik kömek arkaly ýagdaýy kadalaşdyrmak mümkinçiliklerine aýratyn üns berildi.

Türkmenistanyň daşary syýasat edarasynyň ýolbaşçysy ýurduň üç gezek BMG-niň Baş Assambleýasynyň Kararnamalary bilen hemişelik bitaraplyk derejesiniň tassyk edilendigini nygtap, ýurduň halkara meseleleri parahatçylykly ýol bilen çözmäge ygrarlydygyny aýtdy. Türkmenistan häzirki wagtda Ýakyn Gündogarda ýüze çykan ýagdaýy çözmekde diplomatik serişdeleriň we usullaryň iň giň mümkinçiliklerini ulanyp gatnaşmaga taýýardygyny beýan etdi.

Söhbetdeşlik ynanyşma we konstruktiw ýagdaýda geçirildi.