Türkmenistanyň Daşary işler ministriniň orunbasary Ahmet Gurbanow 2025-nji ýylyň 17-nji iýunynda geçirilen Türkmenistan bilen Ýewropa Bileleşiginiň arasynda adam hukuklary boýunça dialogyň 17-nji mejlisiniň çäklerinde Ýewropanyň daşarky syýasat işi gullugynyň Aziýa ýurtlary boýunça direktory Paola Pampaloni bilen duşuşyk geçirdi.

Türkmenistanyň DIM-niň anna güni habar bermegine görä, Ýewropanyň daşarky syýasat işi gullugynyň Aziýa ýurtlary boýunça direktory Paola Pampaloni bilen geçirilen duşuşykda Owganystandaky ýagdaýlar bilen baglylykda sebitleýin howpsuzlyk meseleleri ara alnyp maslahatlaşyldy.

Türkmen tarapy bitaraplyk, hoşniýetli goňşuçylyk hem-de döwletleriň içerki işlerine goşulmazlyk ýörelgelerine esaslanýan çemeleşmesini beýan etdi. Türkmenistanyň Owganystanda parahatçylygy we durnukly ösüşi dikeltmäge gönükdirilen başlangyçlary yzygiderli öňe sürýändigi, şol sanda ynsanperwer kömegini hem-de parahatçylyk başlangyçlaryna goldaw berýändigi nygtaldy.

Şeýle hem Türkmenistan–Owganystan demir ýolunyň gurluşygy hem-de täze energetika we ulag geçelgeleriniň döredilmegi ýaly iri infrastruktura taslamalarynyň durmuşa geçirilmegine aýratyn üns berildi.

Türkmenistanyň Adalatçysy Ýazdursun Gurbannazarowa bilen Ýewropa Adalatçysynyň Kabinetiniň ýolbaşçysy Lambros Papadiasyň arasynda geçirilen duşuşyk, 2025-nji ýylyň 17-nji iýuny (Surat: Türkmenistanyň DIM-i)

Mundan başga-da, mejlisiň çäklerinde Türkmenistanyň Adalatçysy Ýazdursun Gurbannazarowa bilen Ýewropa Adalatçysynyň Kabinetiniň ýolbaşçysy Lambros Papadiasyň arasynda duşuşyk geçirildi.

Duşuşygyň barşynda taraplar gatnaşyklaryň mümkinçiliklerine ýokary baha berdiler hem-de iki institutlaryň arasyndaky hünär gatnaşyklaryny pugtalandyrmagyň möhümdigini bellemek bilen, ýygy-ýygydan ikitaraplaýyn hyzmatdaşlyga we amaly çäreleri geçirmäge taýýardyklaryny beýan etdiler.