“Türkmentelekom” kompaniýasy simsiz internet ulgamlaryny ösdürmegi dowam etmek bilen, Aşgabadyň jemgyeýtçilik ýerlerinde, Halkara howa menzilinde we ýurduň iri şypahanalarynyň çäklerinde “TELECOMWIFI” ulgamyna amatly birikmek hyzmatyny üpjün edýär. Bu barada kompaniýanyň metbugat gullugy habar berýär.

Aşgabat şäheriniň ýaşaýjylary we myhmanlary belli şäher ýerlerinde şu nyrhlar boýunça internete birigip bilerler: 1 sagat – 5 manat, 3 sagat – 10 manat, bir gije-gündiz – 15 manat, hepdelik – 50 manat we aýlyk – 150 manat. Aşgabadyň Halkara howa menziliniň üstaşyr geçiş zolagynda ýokary tizlikli internete birikmek hyzmatynyň gije-gündizlik bahasy 5 ABŞ dollaryna deň bolan ýörite nyrh meýilnamasy hereket edýär. 

Şeýle hem kompaniýa “Arçman”, “Baýramaly”, “Mollagara”, “Farap”, “Daşoguz” we “Bagabat” şypahanalarynda dynç alýanlar üçin amatly internet hyzmatyny hödürleýär. “TELECOMWIFI”-yň 10 günlük çäksiz internetine birikmegiň bahasy 30 manada deňdir. 

Nyrhlar we hyzmatyň hödürlenilýän ýerleri barada doly maglumaty kompaniýanyň telecom.tm/ru/wifi web-saýtynda ýerleşdirilendir. Ähli soraglar boýunça 071 belgili goldaw merkezine ýüz tutulyp bilner. 

“Türkmentelekom” elektrik aragatnaşyk kärhanasy ýuridiki şahslar üçin täze “Call Centre” hyzmatyny hödürledi. Müşderiler bilen aragatnaşygy gowulandyrmagy maksat edinýän bu hyzmat kiçi, orta we iri telekeçilige niýetlenendir.