“Belavia” awiakompaniýasy 20-nji maýdan 25-nji iýula çenli Minsk-Türkmenbaşy-Minsk ugry boýunça uçuşlary ýerine ýetirmegi bes edýär. Bu döwürde uçuşlar Balkan welaýatynyň Jebel şäherçesiniň golaýynda ýerleşýän Balkanabat Halkara howa menziline üýtgedilýär diýip, Türkmenistanyň resmi metbugaty çarşenbe güni habar berdi.

Petekleri bellenen ugra üýtgetmek talap edilmeýär. Ähli ýolagçylar gonuş we uçuş howa menziliniň üýtgändigi barada SMS habarnamasy we elektron poçta salgysy arkaly öňünden habardar edildi.

Uçuşlar hepdede iki gezek – sişenbe we ýekşenbe günleri ýerine ýetiriler. Uçuş wagty senä görä üýtgeýär. Sişenbe günleri Minskden giç agşam uçýan uçar ertesi gün daňdan Balkanabat Halkara howa menzilinde gonýar. Ýekşenbe günleri uçuşlar möwsüme görä, ýa ir ertir ýa-da ýarygije wagty amala aşyrylýar. Türkmenistandan uçuşlarda hem şunuň ýaly üýtgeşmeler bolýar.

Petekleri awiakompaniýanyň Aşgabatdaky we beýleki şäherlerdäki şahamçalarynda alyp bolýar.