Türkmenistanyň daşary işler ministri Raşid Meredow 18-19-njy maýda Eýranyň paýtagtynda geçirilen “Tähran dialog forumy – 2025” forumyna gatnaşdy. Ol halkara çärede eden çykyşynda durnukly ykdysady ösüşiň we sebit hyzmatdaşlygynyň möhüm guraly hökmünde ulag-logistika arabaglanyşygyny ösdürmegiň meseleleri boýunça Türkmenistanyň garaýşy bilen tanyşdyrdy.

Eýranyň DIM-iniň Syýasy we halkara barlaglar merkezi tarapyndan guralan forum 150-den gowrak wekiliýeti bir ýere jemledi. Bu barada Türkmenistanyň DIM-i habar berýär.

“Hindi subkontinentinden Ýewraziýa çenli: ulag geçelgeleri, geoykdysadyýet we açylýan mümkinçilikler” atly maslahatlaşmalaryň dowamynda R.Meredow yklym ähmiýetli ulag geçelgelerini durmuşa geçirmekde halkara hyzmatdaşlygynyň möhümdigine ünsi çekdi. Şeýle hem Türkmenistanyň “Beýik Ýüpek ýolunyň dikeldilmegi” atly başlangyjynyň Ýewraziýa giňişliginde özara arabanlanyşýan ulag geçelgesini döretmäge gönükdirilendigi bellenildi.

Türkmenistanyň baş diplomaty şeýle hem ulag diplomatiýasy ulgamynda – ulag desgalarynyň gurluşygy, Hazar deňzindäki portlaryň döwrebaplaşdyrylmagy, sebit döwletleri, şol sanda Gazagystan, Özbegistan we Eýran bilen hyzmatdaşlygyň berkidilmegi ýaly Türkmenistanyň ileri tutýan ugurlary barada gürrüň berdi.

Raşid Meredow Türkmenistanyň daşary ykdysady strategiýasynda energetika pudagynyň ähmiýetini nygtady. Hususan-da, tebigy gazyň iberilişini diwersifikasiýalaşdyrmak we Günbatar Aziýa döwletlerine elektrik energiýasynyň eksportyny giňeltmek boýunça taslamalar barada durlup geçildi.

Forumyň çäklerinde R.Meredow daşary ýurt wekiliýetleriniň ýolbaşçylary bilen birnäçe ikitaraplaýyn duşuşyklary geçirdi. Olaryň dowamynda döwletara dialogy çuňlaşdyrmagyň geljegi ara alnyp maslahatlaşyldy.