Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow duşenbe güni Birleşen Arap Emirlikleriniň (BAE) wise-prezidenti, Prezidentiniň Diwanynyň işleri boýunça ministri Şeýh Mansur bin Zaýed Al Nahaýýan bilen telefon arkaly söhbetdeş boldy. Onuň barşynda täze bilelikdäki taslamalaryň geljegi ara alnyp maslahatlaşyldy diýip, Türkmenistanyň resmi metbugaty habar berýär.

Söwda-ykdysady hyzmatdaşlygy ösdürmek, şol sanda söwda dolanyşygynyň oňyn depgini, Emirlikleriň kompaniýalary bilen üstünlikli alnyp barylýan hyzmatdaşlyk gepleşikleriň esasy mazmuny boldy.

Taraplar BAE-niň ADNOC we Malaýziýanyň “Petronas” kompaniýalarynyň gatnaşmagynda energetika ulgamynda baglaşylan ylalaşyklara aýratyn üns çekdiler. Taraplaryň pikirlerine görä, bu ylalaşyk özara bähbitli gatnaşyklaryň pugtalandyrylmagyna uly goşant goşar.

Söhbetdeşligiň ahyrynda Gurbanguly Berdimuhamedow we Şeýh Mansur bin Zaýed Al Nahaýýan birek-birege berk jan saglyk, işlerinde üstünlikleri, Türkmenistanyň we BAE-niň halklaryna parahatçylyk we rowaçlyk arzuw etdiler.