2025-nji ýylyň 24-25-nji maýynda Türkmenistanyň paýtagtynda “Ak şäherim Aşgabat” atly XXIV köpugurly halkara sergisi we maslahaty geçiriler. Oňa dünýäniň 30 ýurdundan 400-den gowrak wekil gatnaşar diýip, çäräni guraýjylar habar berýär.

Aşgabat şäheriniň häkimligi, Türkmenistanyň Söwda-senagat edarasy we “Türkmen Energiýa Forum” hojalyk jemgyýeti giň gerimli çäräni guraýjylar bolup çykyş edýär. Sergi meýdançasynda döwlet düzümleriniň, işewürlik wekilleriniň, ylmy jemgyýetçiligiň we halkara guramalaryň 150-den gowrak diwarlygy ýaýbaňlandyrylar.

Şäher gurşawyny durnukly ösdürmek, şäher ýerlerinde ulanylýan döwrebap çözgütler, sanly we ekologiýa tehnologiýalar maslahatyň esasy mowzuklary bolar.

Maslahatyň maksatnamasynda BMG-niň edaralarynyň ýokary derejeli wekilleriniň çykyşlary göz öňünde tutulýar. BMG-niň Ilatly nokatlar boýunça maksatnamasynyň Ýerine ýetiriji direktory Anaklaudiýa Rossbah, Senagat ösüşi boýunça guramasynyň Baş direktorynyň orunbasary Siýun Szou Türkmenistan bilen bilelikdäki taslamalar, şeýle hem “Aşgabat-Siti” başlangyjy barada gürrüň bererler.

Gatnaşyjylar Durnukly ösüş maksatlarynyň durmuşa geçirilişinde we şäher infrastrukturasyna ekologiýa taýdan arassa usullaryň ornaşdyrylyşynda halkara hyzmatdaşlygynyň geljegini ara alyp maslahatlaşarlar.

Foruma gatnaşmak üçin hasaba alyş işi ashgabat-white-city.com web-saýtynda 20-nji maýa çenli açykdyr.