Türkmenistan 14 – 16-njy maýda “Kazan Ekspo” halkara sergiler merkezinde geçirilýän “Russiýa – Yslam dünýäsi: KazanForum” XVI halkara ykdysady forumynyň çäklerinde geçirilýän “Russia Halal Expo” sergisine gatnaşýar. Şu ýylda geçirilýän foruma 103 ýurtdan wekiller gatnaşýarlar.

“Russia Halal Expo” sergisi – bu maýa goýum we infrastruktura taslamalary hem-de Yslam ýurtlarynyň ykdysadyýetleri üçin täze başlangyçlary tanyşdyrmak üçin Russiýada geçirilýän iň iri çäredir. Sergide B2B taslamalar, Yslam ýurtlarynyň maliýe ulgamlarynyň işleri, maşyngurluşyk, kiçi we orta telekeçiliginiň önümleri, halkara hem-de sebit düzümlere degişli diwarlyklar tanyşdyrylýar. Bu barada çäräniň web-saýtynda habar berilýär.

“Russia Halal Expo” sergisinde Türkmenistanyň diwarlygy, 2025-nji ýylyň 15-nji maýy, Kazan, Tatarystan (Surat: kommersant.ru)

“Russiýa – Yslam dünýäsi: KazanForum” forumy bolsa Russiýa Federasiýasy bilen Yslam Hyzmatdaşlyk Guramasyna agza ýurtlaryň arasynda ykdysady gatnaşyklary berkitmek üçin möhüm ähmiýetli çäreleriň biri hasaplanylýar. Türkmenistanyň bu foruma gatnaşmagy onuň, hususan-da, halal önümleriň senagatynda halkara söwda-ykdysady hyzmatdaşlygy giňeltmäge çalyşýandygyny tassyklaýar.

Forum oňa gatnaşyjylara hyzmatdaşlygy ýola goýmak, işewürlik taslamalary ilerletmek we täze bazarlary ýüze çykarmak üçin giň mümkinçilikleri hödürleýär.