Türkmenistan sebitleýin ulag geçelgelerini kämilleşdirmek boýunça toplumlaýyn tagallalarynyň netijesinde Aziýa bilen Ýewropanyň arasynda möhüm üstaşyr geçelge hökmünde eýeleýän ornuny barha berkidýär. Munuň şeýledigine Germaniýanyň Halkara hyzmatdaşlyk boýunça jemgyýetiniň (GIZ) 2024-nji ýylyň oktýabr-noýabr aýlarynda geçiren barlaglary hem şaýatlyk edýär diýip, Türkmenistanyň resmi metbugaty şenbe güni habar berdi.

Geçirilen barlaglara laýyklykda, Türkmenistanyň serhedinden ýükleri geçirmäge sarp edilýän ortaça wagt 50 minuda deňdir. Bu Merkezi Aziýada iň az görkezijidir. Deňeşdirme hökmünde alsak, bu babatda Gazagystandaky görkeziji 2 sagat 26 minuda, Täjigistandaky görkeziji 1 sagat 50 minuda, Gyrgyzystandaky görkeziji 1 sagat 28 minuda, Özbegistandaky görkeziji hem 1 sagat 25 minuda deňdir.

Hasabatda bellenilişi ýaly, şeýle görkezijileri Türkmenistanyň Döwlet gümrük gullugy tarapyndan sanly tehnologiýalaryň işjeň ornaşdyrylmagy netijesinde gazanmak başartdy. Gulluk gümrük amallaryny ýeňilleşdirmäge we umumylaşdyrmaga çalyşýar.

Bu görkezijiler ygtybarly üstaşyr köpri hökmünde Türkmenistanyň ornuny barha artýandygyny nygtaýar. Şunda strategik taýdan ähmiýetli bu işde Döwlet gümrük gullugynyň mynasyp orny bar.