“Türkmenaragatnaşyk” agentliginiň düzümine girýän “Türkmentelekom” elektrik aragatnaşyk kärhanasy ýuridiki şahslara “Çagyryş merkezi” (“Call center”) atly täze hyzmatyny hödürledi. Kiçi, orta we iri işewürler üçin niýetlenen bu hyzmat müşderiler bilen aragatnaşygy döwrebaplaşdyrmaga gönükdirilendir diýip, Türkmenistanyň Ministrler Kabinetiniň ýanyndaky Ulag we kommunikasiýalar agentligi habar berýär.

Bu hyzmat bir wagtda şol bir belgä birnäçe giriş jaňlary kabul etmäge mümkinçilik berip, hatda ýokary ýygylykda hem bökdençsiz aragatnaşygy üpjün edýär. Bu müşderileriň köpsanlysy bilen zerur bolan durnukly aragatnaşygy ýola goýmakda aýratyn ähmiýetlidir.

Hyzmata birikdirilmek şertnamalaýyn esasda amala aşyrylýar. Bu çözgüt esasy aragatnaşyk ugruna düşýän ýüki azaltmaga we müşderilere dessin hem-de amatly maglumatlary hödürlemek bilen berilýän hyzmatyň hilini ýokarlandyrmaga ýardam edýär.

“Çagyryş merkezine” awtomatik esasda sesli salamlaşyk, interaktiw sesli menýu (IVR), gerekli işgärlere jaňlary geçirmek we ähli söbetdeşlikleri ýazgy etmek ýaly mümkinçilikler girýär.

Goşmaça maglumaty 071 telefon belgisi arkaly ýa-da “Türkmentelekomyň” resmi web-saýtyndan alyp bolýar.