Türkmenistanyň Hormat garawuly rotasy 2025-nji ýylyň 9-njy maýynda Moskwada Ýeňiş güni mynasybetli geçiriljek dabaraly harby ýörişe gatnaşar. Türkmen harbylarynyň Gyzyl meýdandan dabaraly ýöräp geçmegi asylly däbiň dowam etdirilýändiginiň nyşany bolar. Olar 2010-njy we 2020-nji ýyllarda Ýeňiş güni mynasybetli dabaraly ýörişde ýurda wekilçilik edipdiler diýip, Russiýanyň Türkmenistandaky ilçisi Iwan Wolynkin “Neýtralnyý Türkmenistan” gazetine beren interwýusynda mälim etdi.
Ýeňiş güni mynasybetli dabaralar Türkmenistanda döwlet derejesinde geçirilýär. Aşgabatda we beýleki şäherlerde konsertler, mazmunlaýyn sergiler, kino görkezilişler we okuw sapaklary guralýar diýip, diplomat aýtdy.
“Halk hakydasy” ýadygärlikler toplumyndaky “Baky Şöhrat” ýadygärligine gül goýmak dabarasy esasy çäreleriň biri bolar. Oňa her ýyl Türkmenistanyň ýolbaşçylary, diplomatik wekilhanalaryň we jemgyýetçilik guramalarynyň wekilleri gatnaşýarlar. Weteranlara maddy kömekler berlip, sowgatlar we pul serişdeleri gowşurylýar.
2024-nji ýylda Türkmenistanyň Prezidenti Serdar Berdimuhamedow 1941 – 1945-nji ýyllaryň Beýik Watançylyk urşunda gazanylan Ýeňşiň 79 ýyllygy mynasybetli Moskwada geçirilen dabaraly harby ýörişe hormatly myhman hökmünde gatnaşdy.