Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow duşenbe güni resmi sapar bilen Fransiýa Respublikasyna bardy. Bu barada Türkmenistanyň resmi metbugaty habar berýär. 

Irden Aşgabat şäheriniň Halkara howa menzilinde Gurbanguly Berdimuhamedowy Türkmenistanyň resmi adamlary ugratdylar. Pariž şäheriniň iki ýurduň Döwlet baýdaklary bezelen “Orli” halkara howa menzilinde türkmen wekiliýetiniň uçary gelip gondy. Türkmen halkynyň Milli Lideri Fransiýanyň wekilleri hem-de türkmen wekiliýetiniň agzalary tarapyndan mähirli garşylandy. Resmi garşylamak dabarasyna hormat garawulynyň esgerleri hem gatnaşdylar. 

Resmi garşylamak dabarasynyň çäklerinde Gurbanguly Berdimuhamedow Fransiýanyň resmi wekili bilen gürrüňdeş boldy. Fransuz wekili Türkmenistan bilen köpugurly hyzmatdaşlygy mundan beýläk-de pugtalandyrmaga Fransiýanyň gyzyklanma bildirýändigini nygtap, saparyň üstünlikli geçmegini arzuw etdi. 

Habarda bellenilişi ýaly, şu gezekki sapar ikitaraplaýyn hyzmatdaşlygyň ösüşine goşmaça itergi berip, Türkmenistan bilen Fransiýanyň arasyndaky gatnaşyklarda täze sahypany açar.