Türkiýe ýene bäş ýyldan Hazar deňziniň düýbünden çekilen turbageçiriji arkaly Türkmenistandan tebigy gaz import eder. Bu barada Türkiýäniň Prezidenti Rejep Taýyp Ärdogan Stambul şäherinde geçirilen Tebigy baýlyklar boýunça sammitde eden çykyşynda mälim etdi diýip, Türkmenistanyň Ministrler Kabinetiniň ýanyndaky Ulag we kommunikasiýalar agentligi habar berýär. 

Türk Lideriniň bellemegine görä, eýýäm şu ýylyň martyndan türkmen gazyny ibermek işi Eýranyň çäginden amala aşyrylyp başlandy. Şondan bäri bu ugur boýunça Türkiýä 250 million kubmetre golaý “mawy ýangyç” gelip gowuşdy. Ýylyň ahyryna çenli onuň möçberi 1,3 milliard kubmetre ýetirilip bilner. 

Ärdogan Türkmenistan bilen energetika hyzmatdaşlygy ösdürmegiň Türkiýäniň ileri tutýan ugurlarynyň biri bolmagynda galýandygyny belledi.

Türkmen gazyny Türkiýä ibermek hakynda ylalaşyk 2025-nji ýylyň 10-njy fewralynda iki ýurduň wekiliýetleriniň arasynda geçirilen gepleşikleriň netijesinde gol çekildi.