“Türkmenistan awiakompaniýasy” açyk görnüşli paýdarlar jemgyýeti 2025-nji ýylyň 14-nji iýulyndan Aşgabat we Seul şäherleriniň arasynda yzygiderli uçar gatnawlaryny ýola goýar. Bu barada awiakompaniýanyň metbugat gullugy anna güni habar berdi.

Täze gatnaw Türkmenistan bilen Koreýa Respublikasynyň paýtagtlarynyň arasynda göni howa aragatnaşygyny üpjün etmek bilen, syýahatçylaryň mümkinçiliklerini giňelder.

Howa gatnawlaryny amala aşyrýan Türkmenistanyň milli düzümi bolan “Türkmenistan” awiakompaniýasy 1992-nji ýylda döredildi. Ol içerki, şol sanda halkara uçuşlary ýerine ýetirmek bilen, Ýewropa, Aziýa, GDA we Ýakyn Gündogar ýurtlarynyň iri şäherlerini türkmen paýtagty bilen özara baglanyşdyrýar.

Milli awiakompaniýanyň uçarlary esasan “Boeing” we “Airbus” kompaniýalarynyň döwrebap uçarlaryndan ybaratdyr. Şolaryň hatarynda ýük daşamalary üçin niýetlenen uçarlar hem bar.