Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň we Gazagystanyň Prezidenti Kasym-Žomart Tokaýewiň resmi däl duşuşygy geçirildi. Onda iki ýurduň arasynda özara söwda dolanyşygyny ýakyn ýyllarda 1 milliard ABŞ dollaryna çenli artdyrmagyň möhümdigi bellenildi diýip, Gazagystanyň Prezidentiniň metbugat gullugy sişenbe güni habar berdi. 

Taraplar gaz pudagyna aýratyn üns bermek bilen, köptaraply strategik hyzmatdaşlygy pugtalandyrmak boýunça özara pikir alyşdylar. Hususan-da, bu ýerde gürrüň Türkmenistanyň iri “Galkynyş” gaz känini özleşdirmek boýunça taslama Gazagystanyň gatnaşmagy barada boldy. 

Ulag geçelgelerini diwersifikasiýalaşdyrmakda we eksport mümkinçiliklerini giňeltmekde Turgundy-Hyrat-Kandagar-Spin-Buldak demir ýol taslamasyna aýratyn üns berildi. Gazagystan-Türkmenistan-Eýran demir ýol geçelgesi we Türkmenbaşy-Garabogaz-Gazagystanyň serhedi awtomobil ýolunyň gurluşygy üstaşyr geçelgeleri ösdürmekde möhüm şertler bolup durýar. 

Türkmenistanyň Halk Maslahatynyň Başlygy Gurbanguly Berdimuhamedowyň Gazagystanyň Prezidenti Kasym-Žomart Tokaýew bilen duşuşygy, 2025-nji ýylyň 22-nji apreli, Türküstan, Gazagystan (Surat: akorda.kz)

Gurbanguly Berdimuhamedow we Kasym-Žomart Tokaýew şeýle hem bilim we sanly ulgamlar babatda hyzmatdaşlygyň geljegine hem garadylar. 

Gazagystana dostlukly saparynyň çäklerinde türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Gazagystan Respublikasynyň Prezidenti Kasym-Žomart Tokaýew bilen bilelikde Türküstan şäherindäki taryhy-medeni ýerleriň birnäçesine baryp gördüler.