Türkmenistan 1966-njy ýylyň Ýük markalary hakynda halkara Konwensiýasyna degişli 1988-nji ýylyň Teswirnamasyna resmi taýdan goşuldy. Degişli Kanun anna güni çap edilen “Neýtralnyý Türkmenistan gazetinde çap edildi. 

Halkara Konwensiýa gämileriň suw üstündäki bortuna, şol sanda bölümleriniň bölünişine, adatdan daşary ýagdaýlarda çaýkanmazlyk derejesiniň hasaplanyşyna bildirilýän talaplary kesgitleýär hem-de harby gämilerden başga halkara ýüzüşleri amala aşyrýan, jemi göwrümi 150 tonnadan az bolmadyk ähli gämilere, şol sanda balykçylyk gämilerine, hususy ýahtalara degişlidir. 

Şu Teswirnama gatnaşýan taraplar ýük markalarynyň halkara ölçegleri bilen baglanyşykly meseleleri düzgünleşdirýän, kabul eden ähli täze kanunçylyk namalarynyň nusgalaryny Halkara Deňiz Guramasynyň Baş sekretaryna ibermäge borçlanýarlar. 

2003-nji ýylda 1988-nji ýylyň Teswirnamasynyň üýtgetmeler girizilen Goşundysy kabul edildi. Onda zeper ýetmedik ýagdaýlarda gämileriň berklik we çaýkanma derejesine degişli wajyp üýtgetmeler girizildi. Şeýle hem üstki böleginiň gurluşygy, ýygnalyşy, gapylary, lýuklary, maşyn enjamlary bölüminiň ýerleşdirilişi, bortuň üstki böleginiň palubalary, yşyklandyryjylar, ekipažyň goraglylyk derejesi, işgärleriň howpsuz geçmegi üçin serişdeler ýaly dürli elementlere bildirilýän talaplar anyklaşdyryldy.