2025-nji ýylyň 15-nji aprelinde Türkmenistanyň Horwatiýa Respublikasyndaky Adatdan daşary we Doly ygtyýarly Ilçisi (oturýan ýeri Buharest ş.) A.Annaýewiň Horwatiýa Respublikasynyň Daşary we ýewropa işleri ministri Gordon Grlik Radman bilen duşuşygy geçirildi.

Duşuşygyň gün tertibine ikitaraplaýyn hyzmatdaşlygyň dürli pudaklaryny öz içine alýan meseleleriň giň toplumy girizildi.

Söwda-ykdysady hyzmatdaşlygyň ösüşine aýratyn üns berildi. Iki ýurduň işewür toparlarynyň arasynda göni aragatnaşygy ýola goýmaga ýardam edýän yzygiderli duşuşyklaryň, işewürler forumlaryň we sergileriň wajyplygy barada bellenip geçildi. Şunuň bilen baglylykda, Ykdysady hyzmatdaşlyk boýunça türkmen-horwat hökümetara toparynyň işiniň depgininiň artmagynyň ähmiýeti barada nygtaldy. Taraplar gami gurluşyk, derman, himiýa, azyk senagaty, gurluşyk, şol sanda deňiz portunyň gurluşygy, syýahatçylyk infrastrukturasy, gaýtadan işleýän senagat, ýokary tehnologiýalar, ylym, bilim ýaly ugurlarda hem-de beýleki pudaklarda gatnaşyklary giňeltmek babatda pikir alyşdylar.

Şol gün A.Annaýew Hökümetara türkmen-horwat dostluk toparynyň rumyn tarapyndan başlygy deputat Goran Kaniski bilen duşuşdy.

Gepleşikleriň barşynda türkmen diplomaty hökümetara dialogy işjeňleşdirmegiň wajyplygyny nygtap, 2016-njy ýylda ýokarda agzalan dostluk toparynyň döredilmeginiň iki ýurduň kanun çykaryjy edaralarynyň arasyndaky ikitaraplaýyn hyzmatdaşlykda uly itergi bolup durýandygyny aýtdy.

Türkmenistanyň halkara giňişliginde alyp barýan işjeň syýasaty hakynda aýdyp, taraplar Durnukly Ösüş Maksatlarynda berkidilen meseleleri durmuşa geçirmekde ýurduň oňyn Bitaraplygynyň mümkinçilikleri barada bellediler.

Günüň ikinji ýarymynda Ilçi A.Annaýew Horwatiýa Respublikasynyň Medeniýet we media ministrliginiň Halkara medeni hyzmatdaşlyk we ýewropa işleri müdirliginiň direktory Anýa Ýelawiç bilen duşuşdy. Direktor horwat tarapynyň türkmen tarapy bilen medeniýet we medeni alyş-çalyş, ikitaraplaýyn çärelere gatnaşmak, şeýle-de türkmen muzeýleri bilen gatnaşyklary ýola goýmak babatda hyzmatdaşlyga isleg we gyzyklanma bildirýändigi barada belläp geçdi.