Türkmenistan Hazar deňzinde suwasty üpjünçilik ulgamlarynyň gurulmagyny umumylykda, bähbitleri we peýdany deňhukukly hasaba almak esasynda Ýewraziýa sebitinde energetika, ykdysady, ulag durnuklylygyny üpjün etmegiň möhüm şerti hasaplaýar. Bu barada Türkmenistanyň Prezidenti Serdar Berdimuhamedow anna güni Samarkant şäherinde geçirilen “Merkezi Aziýa – Ýewropa Bileleşigi” birinji sammitiň dowamynda mälim etdi diýip, Türkmenistanyň resmi metbugaty habar berýär. 

Bu ugur ähli kenarýaka döwletleriň ykdysady talaplaryna laýyk gelýär hem-de Ýewraziýada energetika, ulag we ykdysady durnuklylygyň pugtalandyrylmagyny şertlendirýär. 

Ulag-aragatnaşyk, hususan-da, Gündogar-Günbatar we Günbatar-Gündogar durnukly ulag aragatnaşygyny döretmek sebit ösüşiniň möhüm düzümleriniň biri hökmünde görkezildi. Şunuň bilen baglylykda, Hazarüsti ulag ugruna uly orun berilýär. Türkmenistan Türkmenbaşy Halkara deňiz portunyň kuwwatyny, şeýle hem özüniň ýol ulgamlaryny şu taslama üçin ulanmaga taýýardyr.

Medeni-ynsanperwer hyzmatdaşlyk ileri tutulýan ugur bolmagynda galýar. Türkmenistan ÝB-niň köp ýyllaryň dowamynda Merkezi Aziýa sebitinde durmuşa geçirýän bilim makstanamalaryna ýokary baha berýär hem-de hünär bilimi ulgamynda bilelikdäki taslamany işe girizmek başlangyjy bilen çykyş edýär. 

Taryh, arheologiýa, etnografiýa babatda ylmy barlaglary işjeňleşdirmek we ekologiýa maksatnamasyny hem-de etnografiýa syýahatçylygyny ösdürmek teklip edilýän ugurlaryň hatarynda boldy. 

Türkmenistanyň Prezidenti Serdar Berdimuhamedow şeýle hem Ýewropanyň kompaniýalaryny türkmen bazarynda taslamalary durmuşa geçirmäge çagyrdy. Şunda Türkmenistanyň daşary ýurt maýadarlary üçin iň amatly şertleri döretmäge taýýardygy tassyklanyldy.