Türkmenistanyň Prezidenti Serdar Berdimuhamedow anna güni Samarkant şäherinde Ýewropanyň kompaniýalaryny türkmen bazarynda taslamalary durmuşa geçirmäge çagyrdy. Şunda Türkmenistanyň daşary ýurt maýadarlary üçin iň amatly şertleri döretmäge taýýardygy tassyklanyldy diýip, Türkmenistanyň resmi metbugaty habar berýär.

Samarkant şäherinde geçirilen “Merkezi Aziýa – Ýewropa Bileleşigi” birinji sammitinde çykyş eden Türkmenistanyň Prezidenti öz ýurdunyň Ýewropa bilen söwda-ykdysady hyzmatdaşlygy giňeltmäge gyzyklanma bildirýändigini belledi hem-de eksport we import işine gatnaşýan taraplary goldamak maskatnamasyny işe girizmek mümkinçiligine garamagy ÝB-e teklip etdi.

Serdar Berdimuhamedow Ýewropa Bileleşiginiň Merkezi Aziýanyň infrastruktura taslamalaryna maýa goýumlarynyň ägirt uly geoykdysady we söwda bähbitlerini getirip biljekdigini hem-de ýewropaly işewürleriň sebitde eýeleýän ornuny berkitjekdigini belledi.

“Biziň sebitimiz senagat maksatly iri döwrebap önümçilikleri döretmek, ulag-aragatnaşyk ulgamyny ösdürmek, ylmy-tehnologiýa klasterleriň we hyzmat merkezleriniň taslamalary üçin Ýewropanyň kompaniýalaryna amatly ýer bolup biler” diýip, Türkmenistanyň döwlet Baştutany aýtdy.

Serdar Berdimuhamedow häzirki söwda-ykdysady hyzmatdaşlyk ýagdaýynyň netijelilik we bar bolan mümkinçiliklere laýyk gelýändigi nukdaýnazardan gaýtadan seretmegi talap edýändigini nygtady.

Türkmenistanyň Prezidenti Serdar Berdimuhamedow şeýle hem sammitiň çäklerinde ýewropaly hyzmatdaşlary gaýtadan dikeldilýän energetika ulgamynda hyzmatdaşlyk mümkinçiliklerini giňişleýin ara alyp maslahatlaşmaga çagyrdy.