Türkmenistan 29-30-njy aprelde Baku şäherinde geçiriljek “Made in Turan” (“Turanda öndürilen”) atly halkara sergä gatnaşar. Bu barada Türkmenistanyň Ulag we kommunikasiýalar agentligi penşenbe güni habar berdi. 

Foruma Türkmenistan bilen bir hatarda, Özbegistanyň, Gazagystanyň, Türkiýäniň, Gyrgyzystanyň, Russiýanyň, Pakistanyň, Hindistanyň, Saud Arabystanynyň, Kataryň, Kuweýtiň, Wengriýanyň we Ýaponiýanyň dokma pudagynyň bilermenleri, dizaýnerleri we telekeçileri gatnaşarlar. Bu çäre dokma senagatynda söwda hyzmatdaşlygyny ösdürmek, telekeçileriň arasynda işewürlik gatnaşyklary giňeltmek, geljegi uly taslamalary ilerletmek meselelerine bagyşlanar.

Serginiň çäklerinde öňdebaryjy bilermenleriň tanyşdyrylyş dabaralarynyň, dokma önümleriň görkezilişleriniň, ikiçäk duşuşyklaryň, işewürlik gepleşikleriň, “tegelek stol” maslahatlaryň we mowzuklaýyn geňeşmeleriň geçirilmegi meýilleşdirilýär.

Sergä gatnaşyjylar şeýle hem ýörite işewürlik gezelenjiniň çäklerinde dokma senagatynda Azerbaýjanyň toplan öňdebaryjy tejribeleri bilen ýakyndan tanyşmaga mümkinçilik alarlar.

“Made in Turan” atly halkara sergi – bu adybir haryt nyşany bilen türki dilli döwletleriň önümlerini we hyzmatlaryny ilerletmäge gönükdirilen başlangyç bolup durýar. Sergi halkara bazarlara bilelikde çykmak, harytlar we hyzmatlar barada habardarlygy we olaryň bäsdeşlige ukyplylygyny ýokarlandyrmak üçin Türki döwletleriň guramasyna (TDG) agza ýurtlaryň tagallalaryny birleşdirmegi maksat edinýär.