5-nji martda General-admiral Russiýa Federasiýasynyň Astrahan sebitiniň F.M.Apraksin adyndaky Hazar deňiz we derýa ulaglary institutynda Gündogaryň beýik akyldary we nusgawy şahyry Magtymguly Pyragynyň döredijiligine bagyşlanyp aýdym-sazly çäre geçirildi.

«Beýik Magtymguly Pyragynyň şygryýet mirasynda zenan kalbynyň çuňlugy» diýip atlandyrylan bu çäre Halkara Zenanlar gününe mynasybetli guraldy. Bu barada Türkmenistanyň Russiýa Federasiýasyndaky konsullygynyň (Astrahan ş.) metbugat gullugy habar berdi.

Çäräniň dowamynda talyplar Magtymguly Pyragynyň döredijiliginden ylham alyp, şahyryň goşgularyndan çeper okaýyşlary we aýdymlary ýerine ýetirdiler.

Şeýle-de çäräniň çäginde şahyryň doglan gününiň 300 ýyllygyna bagyşlanyp geçirilen çäreleri guramakda goşant goşan ýokary okuw mekdepleriň mugallymlaryna, jemgyýetçilik guramalaryň ýolbaşçylaryna Türkmenistanyň konsullygynyň we Astrahan sebitiniň Gubernatorynyň adynda Hormat hatlary we gül desseleri gowşuryldy.