Lebap welaýatynda «Türkmendaşlary» önümçilik birleşigine degişli bolan Künjek kän müdirligi her ýylda magdan däl daşlaryň 640 müň kub metrini gaýtadan işläp, 1 million tonnadan gowrak dürli görnüşli ownuk çagyl öndürýär.

«Türkmenistan» gazetinde çap edilen makalada bellenilişine görä, müdirlige çig mal almak üçin bölünip berlen 200 gektar meýdandan dürli görnüşli tehnikalaryň kömegi bilen gazylyp alynýan daşlar gaýtadan işlenilende, sarp edijiniň islegi nazara alynýar. Has takygy, haýsy görnüşli çagla isleg uly bolsa, şol önüm beýlekilerden köp öndürilýär.

Şeýlelikde, Türkmenistanyň dag-magdan senagaty üçin zerur bolan önümleriň ep-esli möçberi hut şu sebitden alynýar. Demir ýol çekilende ulanylýan gyýçak daşlar hem hut şu kärhananyň önümleridir. Netijede, bu ýerde öndürilýän selestin, karbit, gýuşa daşlary, gipsokarton, dürli maksatly gury garyndylardyr reňk önümleriniň hatary geljekde has-da artar.

Sebitde gözleg we anyklaýyş işlerini geçiren alymlar, «Köýtendag» geologiýa-gözleg ekspedisiýasynyň hünärmenleri bu ýerlerde Mendeleýewiň periodik tablisasynda görkezilen elementleriň 30-a golaýynyň bardygyny aýdýarlar diýlip, makalada bellenilýär.