17 — 31-nji awgust aralygynda Astrahan şäherinde geçirilýän «Hazar möwsümleri» atly halkara festiwalyň çäklerinde 24-nji awgustda «Türkmenistanyň gününe» bagyşlanyp, Astrahan flarmoniýasynda konsert geçirildi. Bu barada Türkmenistanyň Astrahandaky konsullygy habar berýär.

Konsertde Türkmenistanyň halk artisti Atajan Berdiýewiň ýolbaşçylygyndaky döredijilik topary türkmen milli aýdym-sazlary bilen çykyş etdiler. Medeni çärä Astrahan oblastynyň daşary aragatnaşyklar we medeniýet ministrleri, türkmen diasporasynyň wekilleri, türkmenistanly talyplar hem-de ýerli ilat gatnaşdy.

Konsert tomaşaçylarda türkmen milli aýdym-saz sungaty barada ýakymly ýatlama galdyrdy diýlip, habarda bellenilýär.

Konsertiň çäginde filarmoniýanyň eýwanynda Türkmenistanyň Astrahandaky konsullygynyň işgärleri tarapyndan Magtymguly Pyragynyň doglan gününiň 300 ýyllygyna bagyşlanan sergi guraldy.