2025-nji ýylyň 20-nji awgustyndan başlap, Türkiýäniň ýokary okuw jaýlarynda bilim almak üçin talyp wizasyna ýüz tutmak isleýän Türkmenistanyň raýatlary indi nobata bellenmeden Türkmenistandaky Türkiýäniň wiza merkezine ýüz tutup wiza tabşyryp bilerler. Bu barada Türkmenistandaky Türkiýäniň wiza merkezi habar berýär.

Wiza resminamalaryny tabşyrmak üçin okuwa kabul ediş hatlaryny ýa-da talypdygyny tassyklaýan resminamalary hödürlenmelidir.

Zerur resminamalar doly taýýarlanan ýagdaýynda, raýatlar gönüden-göni wiza merkezine ýüz tutup bilerler. Bu wagty tygşytlamaga hem-de nobatlara garaşmazlyga mümkinçilik berer. Türk okuw wizalarynyň resmileşdirilmegi bolsa ýeňilleşdiriler.

2025-nji ýylyň dowamynda Türkiýede 209 ýokary okuw mekdebi hereket edýär. Olaryň 129-sy döwlet, 79-sy bolsa hususy ýokary okuw mekdepleridir. Bu bilim edaralary bakalawriat, magistratura we doktorantura ýaly derejeleri öz içine alýan 45 müňden gowrak bilim maksatnamasyny hödürleýärler.