2025-nji ýylyň 20-nji awgustynda Ýewropa Bileleşigi Türkmenistanyň Döwlet serhet gullugynyň kinologiýa bölümi üçin iki sany ýöriteleşdirilen awtoulagy dabaraly ýagdaýda gowşurdy. Çärä Ýewropa Bileleşiginiň Türkmenistandaky ilçisi Beata Peksa gatnaşdy.

Diplomat ÝB bilen Türkmenistanyň arasyndaky uzakmöhletleýin hyzmatdaşlygyň ähmiýetini belläp, Merkezi Aziýada serhet dolandyryşy ulgamyndaky hyzmatdaşlygyň pugtalandyrylmagyna uly üns berilýändigini aýtdy. Bu barada Ýewropa Bileleşiginiň Türkmenistandaky wekilhanasy habar berýär.

Ulaglar ÝB-niň BOMKA 10 Maksatnamasynyň goldawy bilen satyn alyndy. Bu ulaglar Aşgabadyň we Mary welaýatynyň kinologiýa bölümleriniň işiniň netijeliligini ýokarlandyrmaga we döwlet serhetleriniň ygtybarlylygyny has-da pugtalandyrmaga giň mümkinçilik berer.

BOMKA Maksatnamasy Merkezi Aziýa ýurtlarynyň ykdysadyýetini sebitleýin ösdürmek maksadyna goldaw berýär, şeýle hem sebitdäki, goňşy ýurtlardaky we ÝB agza döwletler bilen arasyndaky söwda gatnaşyklaryň ösdürilmegine giň ýardam berýär.