Türkmen telekeçileri 2025-nji ýylyň 23–25-nji oktýabr aralygynda Pakistan döwletiniň Karaçi şäherindäki “Karachi Expo Center” sergi merkezinde geçiriljek 22-nji halkara “Health API Asia 2025” sergisine, şeýle hem onuň çäklerindäki “Pharma API Asia” we “Pharma Lab Equipment” ýaly ugurdaş çärelerine gatnaşmaga çagyryldy. Bu barada Türkmenistanyň Söwda-senagat edarasy habar berýär.

“Health Asia” sergisi Pakistan bazaryndaky iň uly lukmançylyk sergisidir. Ol pudagyň ýokary ýolbaşçylaryny, tejribeli öndürijileri, üpjün edijileri we saglygy goraýyşa ýöriteleşen hünärmenleri bir ýere jemleýär. Çäre bu ugurda tejribe alyşmaga, önümleri tanyşdyrmaga hem-de işewür gatnaşyklary ösdürmäge giň mümkinçilik döredýär.

Ekspozosiýa lukmançylyk we hirurgiýa enjamlary, sarp ediş serişdeleri, hassahana enjamlary, stomatologiýa gurallary, taýýar derman önümleri, lukmançylyk edaralar üçin mebelleri we laboratoriýa enjamlary ýaly birnäçe ugurlara bölünýär.

Mundan başga-da, forumyň çäklrinde hassahana ýolbaşçylary, lukmaçylyk okuw mekdepleriniň wekilleri we saglygy goraýyş edaralarynyň ýolbaşçylary üçin ylmy-amaly maslahatlar, seminarlar hem-de beýleki çäreler geçiriler.