2025-nji ýylyň 18–19-njy sentýabrynda Aşgabatda Türkmenistanyň Maýa goýum Forumy — TIF 2025 geçiriler. Forum sebitde maýa goýum mümkinçilikleriniň, ykdysady hyzmatdaşlygyň geljeginiň ara alnyp maslahatlaşyljak esasy meýdançasyna öwrüler.

“Milli mümkinçilikler, ählumumy hyzmatdaşlyklar” şygary astynda geçiriljek forumda işewür we bilermen toparlarynyň wekilleri Türkmenistanyň ykdysadyýetini döwrebaplaşdyrmak we maýa goýum üçin amatly şertleri döretmek boýunça pikir alyşarlar diýip, forumyň resmi web sahypasynda habar berilýär.

Iki günüň dowamynda gatnaşyjylar ýurdumyzda alnyp barylýan ykdysady özgertmeler we täze başlangyçlar bilen tanyşar, döwlet we hususy kärhanalar bilen göni aragatnaşyklary ýola goýmak, anyk maýa goýum taslamalaryny ara alyp maslahatlaşmak hem-de hyzmatdaşlygyň täze ugurlaryny kesgitlemek mümkinçiligine eýe bolarlar.

Forumyň maksatnamasynda strategiki panel çekişmeleri, maýa goýum taslamalaryň tanyşdyrylyşlary, B2B we B2G duşuşyklary, bilermenler üçin master-klaslar hem-de medeni çäreler göz öňünde tutular.

Geçirilen TIF 2024 forumyna dünýäniň 44 ýurdunyndan 1100-den gowrak wekili gatnaşdy. 18 ylalaşyga we özara düşünişmek hakynda ähtnama gol çekilip, umumy bahasy 167 million amerikan dollaryna barabar şertnamalar baglaşyldy.

TIF 2025-iň guramaçylary bu ýylky forumyň täze maýa goýumlaryň hem-de uzak möhletleýin hyzmatdaşlygyň çeşmesine öwrüljekdigine ynam bildilýärler.