«Azerbaýjan demir ýollary» ÝGPJ-niň wekiliýeti Türkmenistana amala aşyran resmi saparynyň çäklerinde Türkmenbaşy halkara deňiz portunyň düzümi, tehniki mümkinçilikleri we üstaşyr kuwwaty bilen tanyşdy. Duşuşygyň dowamynda taraplar Türkmenbaşy we Baku halkara deňiz portlaryny ösdürmek meýilnamalaryny utgaşdyrmak hem-de deňiz düýbüni çuňlaşdyrmak işlerini ara alyp maslahatlaşdylar.

Duşuşykda Hazar we Gara deňizleriniň arasyndaky baglanyşygyň giňeldilmeginiň Orta geçelgäniň netijeliligini ýokarlandyrjakdygy bellenildi. Portlaryň arasyndaky sazlaşykly hereketler Ýewraziýa ulag geçelgesi boýunça ýükleriň çalt we howpsuz daşalmagyny üpjün etmekde esasy şert hökmünde görkezildi.